Confiar no potencial dos máis novos, estimular as súas mentes e os seus sentidos –o seu ollar e o seu escoitar sempre tan instintivos, tan espertos e receptivos a calquera estímulo–, e posibilitar que se manifesten e compartan as súas inquedanzas a través do cinema son algúns dos desexos do equipo de Novos Cinemas.

Películas documentais, concibidas baixo o influxo dos máis grandes autores, feitas por escolares da nosa comunidade na nova colleita anual de Cinema en Curso; e a presentación dun dos grandes éxitos recentes da animación europea, A vida da Cabaciña, son as dúas propostas da pantalla de +Novos para celebrar nesta Edición 02.