En Novos Cinemas continuaremos na nosa cuarta edición coa nosa clara aposta pola formación audiovisual para todas as idades a través do programa #AULA. Deste xeito, a cineasta Jaione Camborda recolle o testigo de Eloy Enciso, Oliver Laxe ou Lois Patiño e impartirá un obradoiro para o alumnado campus de Pontevedra da Universidade de Vigo. A formación -que levará o nome de “Habitar un rostro / O xesto dun encontro” e se desenvolverá en varias sesións nos próximos meses de setembro, outubro e novembro– estará en todo momento supervisada e titorizada pola cineasta.
Neste obradoiro exploraremos a idea de retrato na súa acepción máis ampla. Buscaremos ir máis alá da representación do outro e apelaremos ao encontro, ao diálogo fílmico, á danza co outro. Deixaremos que a imaxe recolla e reflicta o pulso do cineasta e buscaremos a narrativa desde elementos máis formalistas que beben do cinema de autor documental e do experimental. Achegarse, tensionar, respectar, invadir, dilatar, contraer, respirar, tremer, celebrar…, o cinema como materia viva que expresa o xesto do autor e a súa relación co filmado.
OBXECTIVOS
// Explorar o xesto cinematográfico, a pegada da mirada.
// Tomar conciencia sobre as decisións éticas e estéticas do alumnado nas súas propostas.
// Practicar o traballo en grupo, o intercambio, a discusión e as dinámicas de exploración colectivas como ferramentas imprescindibles no cinema e na descuberta artística.
INFORMACIÓN BÁSICA
// Duración: 24 horas presenciais e titorías en liña
// Número de sesións: catro
// Datas: 20 de setembro / 04 de outubro / 18 de outubro / 22 de novembro
// Horario: de 10.00 a 14.00h e de 16.00 a 20.00h
// Espazo: Facultade de Ciencias Sociais e da Comunicación (Campus A Xunqueira, s/n)
PROGRAMA DO OBRADOIRO
20 de setembro/ Conceptos básicos e fontes estéticas (I). Horario: 10.00-14.00h
04 de outubro / Conceptos básicos e fontes estéticas (II). Horario: 10.00-14.00h
18 de outubro/ Primeira proxección e análise dos proxectos. Horario: 10.00-14.00h e 16.00-20.00h
22 de novembro/ Revisión das pezas e asesoramento cara a unha montaxe final. Horario: 10.00-14.00h e 16.00-20.00h
11 de decembro/ Exhibición pública das pezas realizadas durante o obradoiro
O equipo de “Novos Cinemas” seleccionará a dez aspirantes. As persoas interesadas cumprimentarán a seguinte: FICHA DE INSCRICIÓN Obradoiro Jaione Camborda. O período de selección terá lugar entre os días 25 de xullo e o 13 de setembro. O 16 de setembro publicarase a listaxe das persoas seleccionadas.
Entre o 16 e o 17 de setembro, o estudantado confirmará a súa participación mediante correo electrónico (co asunto <<OBRADOIRO DE CINEMA CON JAIONE CAMBORDA>>) ao seguinte enderezo vic.pon@uvigo.es (achegaranse os seguintes datos: nome e apelidos, grao e curso e copia dixital do D.N.I)
*Tras confirmar a súa participación, o estudantado comprométese formalmente a asistir a todas as sesións presenciais do obradoiro. No caso de incumprir con ese precepto, o alumno ou alumna perderá, automáticamente, a súa condición de bolseiro ou bolseira.
As pezas resultantes deberán incluir sempre e nun cartón inicial o logo do obradoiro facilitado pola equipa de Novos Cinemas.
BIOGRAFÍA Jaione Camborda Coll
(Donostia/San Sebastián, 1983). Tras rematar os seus estudos cinematográficos na prestixiosa Escola de Cinema de Praga (–FAMU) e na Escola de Cinema de Múnich (HFF) trasládase a Galiza, onde funda Esnatu Zinema, produtora coa que desenvolve un reputado traballo como directora de pezas experimentais rodadas en celuloide. Nestes proxectos opta polo Super 8 ao confiar na materialidade do formato e nas posibilidades estético-líricas que lle ofrece . Partindo dun enfoque etnográfico, a súa obra reflexiona sobre a relación do ser humano co animal, sobre a violencia e sobre o atavismo.
Camborda colabora como guionista e directora de arte en numerosos filmes como Los fenómenos (2014), Las altas presiones (2015) ou Tempo vertical (2017), entre outros. En 2019 produce, escribe e dirixe a súa primeira longametraxe, Arima, pendente de estrear. Os seus filmes exhibíronse en máis de corenta festivais e acadaron numerosos premios. Jaione deseñou e realizou as cabeceiras da Edición 12 do festival Punto de Vista e da Edición 02 de Novos Cinemas.
FILMOGRAFÍA
– Arima (España | 2019 | Longametraxe | Posprodución)–Festival de Gijón (Premio DCP DELUXE Work-in-Progress)
– Rapa das bestas (España | 2017 | 10 min | Super 8 | B/n)–L’Alternativa (Premio Fílmico Crater-Lab/Premio GAC)
_ Proba de axilidade (España | 2015 | 4 min | Super 8 | B/n)
– Nimbos (España | 2015 | 1 h 30 min | Super 8 | B/n)
– Lilit (España | 2015 | 1 min | Super 8 | B/n)
– Cabeceira novos cinemas 02 (España | 2017 | 50 s | Super 8 | B/n)
– Cabeceira punto de vista 12 (España | 2018 | 34 s | Super 8 | C)